Mere saamne do buzurg baite the. Pati patni hain lekin dost zyaada lagrahe the. Unko dekkhe ye baat pakki hogayi thi ki pyaar agar kisise sacche dil se hojaye toh pacchees saal ho ya pacchaas saal pyaar utna hi gehra hota hain jaise pehle hota hain.
"Aap fikr na karo, ye humaari beti jaisi hain", buzurg ne papa se kaha. Ye baat sunke mere papa jo pareshaan horahe the ki main akele itni samaan ke saath train ka safar kaise karungi unko thoda dilaasa hogaya. Do char baatein unke saath karli.
"maa, aap log jao warna dher hojayegi ghar jaane tak. Main teek hu yaha pe", maine maa se kaha.
Lekin maa meri baat kabhi kaha sunti hain jab tak rail ki seeti nahi bajti aur payye shuru nahi hote woh kaha jaane waali thi.
Ye pal bahut bhari hota hain. Do log jo meri duniya hain aur jo mujse bina kisi shart ke pyaar karte hain unse ab bichadne ka samaj aagaya tha. Unhe main khidki se dekrahi thi lekin unhe na chu sakti thi na gale mil sakti thi. Kuch samay baad train aage nikal gaya aur woh peeche reh gaye.
Is beech mere bagal ke seat main ek ladka aake bait gaya. Jawaan tha aur use bhi saamne ke buzurg utne hi pasand aaye jitni ki muje.
"Aapki umar kitni hain matajii"?, Ladke ne dadi se pucha.
Meri umar 76 hain aur muje chashma bhi nahi hain.
Ladka: Sachmain?
Old lady: Ha, bas kabhi kabaar kuch padne ke samay pehenleti hu warna toh main kabhi bhi nahi lagati. Ye bhi nahi pehente. Inki aakhe badi tez hain.
"Kya dadaji aapne kabhi chashma nahi pehna"?, maine chaukanna hoke unse pucha.
Old man: Jii beti. Umar main kamzor zaroor lagta hu lekin aakhen aur shareer se kamzor nahi hu.
Dadaji ek retired service agent hain Karnataka se hain lekin unhe tamil, telugu hindi aur kannada bahut acche se aathi hain.Tamil isliye kyunki unki patni tamil nadu se hain, Hindi isliye kyunki jab woh service pe the toh teen saal apni patni ke saath uttharakhand pe the, tees saal bangalore main aur abhi hyderabad main settle hue hain aur istarah unhe telugu bhi aati hain. Unki patni bhi koi kam nahi hain. Woh bhi ye 4 bashaein ek dum baraabar bol leti hain aur angrezi bhi jaanti hain. Ghar ka saara kaam woh khud karleti hain aur dono roz subah walking keliye jaate hain. Unke ek beta hain jo Germany main apne parivaar ke saath settled hain aur unki poti padaai ke silsile main Netherlands gayi hain. Abhi poti ki shaadi ki baat chalrahi hain. Ye saari baatein dadiji humse kehrahe the. Train ka safar hain toh karna kya hain. Baatein karte raho aur sunte raho :)
Dada aur dadi ne hum sab ka dil jeet liya. Compartment ke sabhi unki baatein badi dilchaspi se sunte rahe. Woh bol rahe the ki unke zamaane main zindagi mushkil toh thi lekin itni saari uljhane nahi hua karti thi. Saral aur saaf hoti thi. Na itni bheed, na itna pradushan. Jaha kahi bhi dekho toh hare bhare ped paude. Aur ab jaha kahi bhi dekho toh bheed, imaaratein, traffic, pani ki samasya, aur na jaane kya kya. Waqt badal tha gaya aur zindagi ki raftaar tez hoti gayi. Dadi ki shaadi 16 saal main hogayi aur dadaji tab 25 saal ke the. Unhone apna diamond jubliee Marraige anniversary pichle saal apne parivaar ke saath Germany main manaya tha. Ye saari baatein unhone humse kahi thi. Muje yaad bhi nahi tha ki itni saari baatein maine kisike saath kab ki thi. Haala ki phone pe baatein toh hoti rehte hain maa, papa, didi aur doston ke saath. Ab ki internet ke zamane main kisike saath baitkar aamne saamne baatein karna ye aajkal kam hi hota hain.
Kuch der baad humaare peedhe ke sabhi log phone pe vyast hogaye. Lekin woh dono buzurg toh ek dusre ke saath baatein karte rahe. Ek dusre main hi mashruf the. Beech main ek do baar apne bete se baat karli. Aur phir kabhi unhone apni phone ko dekha tak nahi.
Pyaar sirf izhaar karna nahi hota, do- chaar pyaari baatein internet main karke, tasveerain upload karke mehange taufe karidke dedenese pyaar thodi hota hain. Aaj ke zamane main jaha breakup, divorce ye sab bade aam shabd hain waha itna pyaar, itni parva, na koi dikaawa, na chal kapat, ye kaha dekne ko milta hain. Hum pyaar ke vaaste bahut se dampati ki misaal diye jaate hain. Laila majnu, Heer Ranjha, Romeo Juliet in sabhi ne to pyaar keliye apni jaan kurbaan kardi thi. Dilwale toh woh hain jo apni aakhri saas tak apne mohabbat ke saath jeete hain, ek dusre ka saath nibaate hain, unki parva karte hain unka sammaan karte hain. Mereliye ye buzurg hi adarsh dampati hain.
Kabhi jo main apni maa se shaadi ka naam sunte hi chid jaaya karti thi aur baatein gumaake shaadi ki baat hamesha taal diya karti thi unko maine aaj shaadi keliye ha kardi aur phone pe bola, "Maa, us din jo aap kisi Arjun ke baare main kehrahi thi na, baat aage chalado. Muje ladka pasand hain". Meri baat sunke mano ki maa ko ekdum zor ka jatka lag gaya. Ye baat sunke woh behat kush hogayi. Unki awaaz se pata chal raha tha.
Aakhir kab tak main bhi shaadi ki baat ko taalti rehti. Kabhi na kabhi toh muje shaadi karni hi hain. Toh phir aaj kyun nahi. Shaadi koi buri cheez nahi hain. Ha kabhi kabhar sochke man thoda ghabra jaata hain. Lekin jab ladka dikne main accha hain aur khaandani hain aur jo muje pasand bhi karta hain, toh baat aage chalane main kya harz hain. Hosakta hain ki yahi mere liye sahi ho. Jo muje pyaar kare, meri parwa kare aur muje maan sammaan de. Muje aise hi sveekaar kare jaise main hu. Kabhi muje badalne ko na kahe. Aur main bhi use kabhi badalne ko nahi kahungi. Hum ek dusre ka saath jeevan bhar tak nibhayenge. Kushi ho ya dukh, saath jeeyenge,
Bilkul un buzurg dampati ki tarah.
1 comment:
Post a Comment